मंगलबार, भाद्र २३ २०८३ | Tuesday 8th September 2026 
जन आकाश
मुक्तक १
झरी हुनालाई पानी आफैं बादल बन्नु पर्छ
गहिराईको अनुभव गर्न खाडल बन्नु पर्छ
फरक कसरी छुटाउन सकिन्छ उस्तै उस्तैमा
अरूलाई साध्य देखाउन आफू पागल बन्नु पर्छ ।
मुक्तक २
आफ्नो हानिको आफैं स्वयं उत्पादक हुनसक्छ
मान्छेले चाहेकोभन्दा नतिजा फरक हुनसक्छ
खुद उभेको धरातल के हो भनी हेक्का नराखेर
अरुको कुभलो सोचे परिणाम घातक हुनसक्छ ।
मुक्तक ३
सँघारमा राख्नु या सयनकक्षमा राख्नु तिम्रै खुसी
निस्शङ्कोच पक्ष वा विपक्षमा राख्नु तिम्रै खुसी
अरूको खुवी र खोट पहिल्याउन नि खुवी चाहिन्छ
जस्तो हु त्यस्तै छु दक्ष या अदक्षमा राख्नु तिम्रै खुसी ।
मुक्तक ४
भेद छैन सयपत्री र मखमली सबैको गलामा सुहाउँछ
हाम्रो वास्तविक पहिचान के, हाम्रै सँस्कारले चिनाउँछ
मानव मात्र हैन सबै प्राणीको सम्मान गर्नुपर्छ उत्तिकै
यही कुरा हामीलाई उज्यालोको पर्व तिहारले सिकाउँछ।
सोनाम शेर्पा
जिरी
दोलखा
© 2026 All right reserved to janaaakash.com | Site By : SobizTrend
