एक वर्षसम्म तलब नपाएपछि ठाटीकाँधका शिक्षक आन्दोलनमा

गाउँ कार्यपालिका र स्थानीय सरकारसँग पटक–पटक सहमति तथा सम्झौता भए तापनि पारिश्रमिक नपाएको उनीहरूको गुनासो छ । ‘हामी त न घरको न घाटको भयौँ । पारिश्रमिक नपाउँदा घरखर्च चलाउनै मुस्किल भइसक्यो,’ एक शिक्षकले दुखेसो पोखे, ‘कि त पारिश्रमिक दिनुपर्‍यो, हैन भने तिमीहरू नपढाऊ भनिदिनुपर्‍यो । एउटा बाटो तय गरिदिएको भए बरु देश ९भारत० गएर रोजगारी गथ्र्यौं ।’

ती शिक्षकका अनुसार उनीहरू एक वर्षदेखि बिना पारिश्रमिक अध्यापन गराइरहेका छन् । पटक–पटक ध्यानाकर्षण गराउँदा पनि सुनुवाइ नभएपछि मंगलबार संघर्ष समिति गठन गरी आन्दोलनको तयारी गरिएको गाउँपालिका अनुदान शिक्षक संघर्ष समितिका सचिव रविलाल देवकोटाले बताए ।

‘एक वर्षभन्दा बढीको पारिश्रमिक भुक्तानी भएको छैन र आगामी आर्थिक वर्षको बजेटमा पनि यस विषयलाई समेटिने छाँटकाँट देखिएन,’ उनले भने ।
उनका अनुसार बुधबार ९आज० देखि पालिकाभित्रका सम्पूर्ण सामुदायिक विद्यालयहरू अनिश्चितकालका लागि बन्द गर्ने र असार ५ गतेदेखि शिक्षा, युवा तथा खेलकुद शाखा, लेखा शाखा तथा प्रमुख प्रशासकीय अधिकृतको कार्यकक्षमा तालाबन्दी गर्ने कार्यक्रम रहेको छ । ‘आफ्नै पारिश्रमिक पाउन पनि आन्दोलन गर्नुपर्ने अवस्था आयो, योभन्दा दुःखद कुरा अरू के हुन सक्छ रु,’ उनले प्रश्न गरे ।

उनका अनुसार यस विषयमा गाउँपालिका अध्यक्ष रक्षबहादुर शाही सकारात्मक देखिए पनि कर्मचारी र वडाध्यक्षहरूले असहयोग गरिरहेका छन् । गाउँपालिकाले एकातिर कार्यरत शिक्षकलाई तलब दिएको छैन भने अर्कोतिर सोही प्रकृतिका नयाँ शिक्षकहरू नियुक्त गरिरहेको छ, जसलाई गाउँपालिकाको गैरजिम्मेवार कदमका रूपमा हेरिएको छ । जनप्रतिनिधिहरूले आफ्ना निकटका व्यक्तिहरूलाई व्यवस्थापन गर्ने नाममा नयाँ नियुक्ति दिइरहेका हुन् ।

‘यो आर्थिक वर्ष सुरु भएपछि धेरै ठाउँमा अनुदान शिक्षकको दरबन्दी रिक्त भएको थियो । नियुक्ति नगरौँ भन्दाभन्दै पनि सुनुवाइ भएन,’ एक जनप्रतिनिधिले भने, ‘तलब दिन नसक्ने कर्मचारी छन् भने अर्कातिर हिसाब–किताब नगरी शिक्षक राख्न लगाउने जनप्रतिनिधि छन् ।’