इन्डोनेसियामा ७.७ म्याग्निच्युडको भूकम्प : कम्तीमा २० जनाको मृत्यु

भूकम्प गएको करिब तीन घण्टापछि सुनामीको चेतावनी हटाइएको थियो। उद्धार अधिकारीका अनुसार माउमेरे सहर आसपासको क्षेत्रमा मात्रै २० जनाको शव भेटिएको छ भने ६ जना घाइते भएका छन्। दुई जना भग्नावशेषमा फसेको आशंका गरिएको छ।

माउमेरे फ्लोरेस द्वीपमा रहेको सिका रेजेन्सीको मुख्य सहर हो। माउमेरे उद्धार कार्यालयका प्रमुख फथुर रहमानका अनुसार भूकम्पको केन्द्रबिन्दु नजिक रहेको नाजेकेओ क्षेत्रमा भने उद्धार टोली अझै पुग्न सकेको छैन।

भूकम्पका कारण सञ्चार सेवा प्रभावित भएको छ। सडकमार्फत नाजेकेओ पुग्ने प्रयास पहिरोका कारण अवरुद्ध भएपछि उद्धार टोली फेरीमार्फत त्यहाँ पुग्ने प्रयास गरिरहेको छ।

राष्ट्रिय विपद् व्यवस्थापन निकाय (बीएनपीबी) का अनुसार नाजेकेओमा करिब २ हजार मानिसलाई सुरक्षित स्थानमा सारिएको छ। भूकम्पका कारण घर, गोदाम तथा सरकारी कार्यालयमा क्षति पुगेको छ। केही क्षेत्रमा सडकमा अत्यधिक जाम हुनुका साथै विद्युत् आपूर्तिसमेत अवरुद्ध भएको छ।

पूर्वी नुसा तेंगारा प्रान्तका गभर्नर इमानुएल मेल्कियादेस लाका लेनाले पत्रकार सम्मेलनमा भवन तथा संरचना भत्किँदा सुतिरहेका कम्तीमा पाँच जनाको मृत्यु भएको बताएका छन्।

रोयटर्सले प्रमाणीकरण गरेको माउमेरेस्थित बन्दरगाहको भिडियोमा एउटा भवन धुलो र भग्नावशेषमा परिणत हुँदा मानिसहरू चिच्याउँदै सडकमा भागिरहेको देखिन्छ।

बीएनपीबीका अनुसार पूर्वी नुसा तेंगारा, पश्चिम नुसा तेंगारा र दक्षिण सुलावेसीका केही क्षेत्रमा शक्तिशाली कम्पन महसुस गरिएको थियो। स्थानीयवासीका अनुसार कतिपय स्थानमा करिब एक मिनेटसम्म जमिन हल्लिएको थियो।

पूर्वी नुसा तेंगारा प्रान्तको एन्डे जिल्लास्थित एउटा अस्पतालले समेत बिरामीलाई भवनबाहिर सुरक्षित स्थानमा सारेको स्थानीय सञ्चारमाध्यमले जनाएका छन्। कम्सास डटकमका अनुसार केही स्थानमा पहिरोसमेत गएको छ।

इन्डोनेसियाको भूभौतिकी निकाय (बीएमकेजी) का अनुसार पहिलो भूकम्प स्थानीय समयअनुसार शनिबार बिहान ४ बजेर ५८ मिनेटमा गएको थियो। भूकम्प करिब १५ किलोमिटर गहिराइमा गएको र त्यसपछि लगातार परकम्पहरू आएका थिए।

बीएमकेजीका अनुसार यही क्षेत्रमा सन् १९९२ मा ७.५ म्याग्निच्युडको भूकम्प गएको थियो। उक्त भूकम्पबाट त्यतिबेला ठूलो क्षति भएको थियो।

भूकम्पपछि इन्डोनेसियाका केही क्षेत्रमा एक मिटरभन्दा कम उचाइका सुनामीका छाल रेकर्ड भएका थिए। यद्यपि, अष्ट्रेलियाको सुनामी चेतावनी केन्द्रले समुद्रमुनि गएको यस भूकम्पबाट अष्ट्रेलियाको मुख्यभूमि, द्वीप वा अन्य भूभागमा सुनामीको खतरा नरहेको जनाएको छ।

इन्डोनेसिया प्रशान्त महासागर वरपरको अत्यधिक भूकम्पीय सक्रिय क्षेत्र ‘प्यासिफिक रिङ अफ फायर’ मा पर्छ। पृथ्वीको भूपर्पटीमा रहेका विभिन्न टेक्टोनिक प्लेटहरू एकआपसमा ठोक्किने तथा सर्ने भएकाले यस क्षेत्रमा भूकम्प र ज्वालामुखीका घटना बारम्बार हुने गर्छन्।