निर्वाचन प्रहरीको पोशाक खरिदबारे संसदीय उपसमितिको पहिलो बैठक बस्दै::Nepal News Portal

निर्वाचन प्रहरीको पोशाक खरिदबारे संसदीय उपसमितिको पहिलो बैठक बस्दै

जन आकाश
बुधबार, असोज २१ २०८३

काठमाडौं । निर्वाचन प्रहरी, नेपाल प्रहरी र सशस्त्र प्रहरी बल नेपालको पोशाक खरिदसम्बन्धी अध्ययन गर्न गठित संसदीय उपसमितिको पहिलो बैठक आज बस्दैछ। प्रतिनिधिसभाअन्तर्गतको सार्वजनिक लेखा समितिले १६ असोजमा निर्वाचन प्रहरीको पोशाक खरिदबारे अध्ययन गर्न उपसमिति गठन गरेको थियो। राष्ट्रिय स्वतन्त्र पार्टीका सांसद मनिष झाको नेतृत्वमा गठित ९ सदस्यीय उपसमितिको बैठक आज दिउँसो २ बजे बस्न लागेको हो। बैठकमा पोशाक खरिदसम्बन्धी विषयमा प्रारम्भिक छलफल गरिने समिति सचिवालयले जनाएको छ।

उपसमितिमा सांसदहरू ऐन महर, योगेश गौचन थकाली, आरेन राई, खगेन्द्र सुनार, खुश्बु ओली, रमेशकुमार मल्ल, गणेश धिमाल र महेन्द्रबहादुर शाही सदस्य छन्। उपसमितिलाई अध्ययनका लागि दुई महिनाको समय दिइएको छ।

नेपाल प्रहरीले गत माघमा निर्वाचन प्रहरीका लागि पोशाक खरिद गरेको थियो। उक्त खरिद प्रक्रियामा अनियमितता भएको दाबी गर्दै सांसद खगेन्द्र सुनारले निरन्तर प्रश्न उठाउँदै आएका छन्। डेढ महिनाका लागि नियुक्त निर्वाचन प्रहरीलाई कमसल सामग्री उपलब्ध गराइएको भन्ने प्रश्नसमेत उठेपछि त्यसबारे अध्ययन गर्न उपसमिति गठन गरिएको हो।

२१ फागुनको प्रतिनिधिसभा निर्वाचनका लागि नेपाल प्रहरीले १ लाख ३३ हजार ९८० जना र सशस्त्र प्रहरी बलले १५ हजार ११० जना निर्वाचन प्रहरी भर्ना गरेका थिए। दुवै निकायमा गरी कुल १ लाख ४९ हजार ९० जना निर्वाचन प्रहरी परिचालन भएका थिए। निर्वाचन प्रहरीका लागि भूगोलअनुसार प्रतिव्यक्ति न्यूनतम ५० हजार ९५४ रुपैयाँदेखि अधिकतम ८६ हजार ४८४ रुपैयाँसम्म खर्च भएको थियो। उनीहरूले ४० दिनको पारिश्रमिक, रासन, यातायात तथा खाजा खर्चबापत रकम पाएका थिए।

सरकारले निर्वाचन प्रहरीको पोशाकका लागि हिमाली क्षेत्रमा खटिने प्रहरीलाई प्रतिव्यक्ति ११ हजार ५००, पहाडी क्षेत्रमा ७ हजार ९४५ र तराईमा खटिने प्रहरीलाई ६ हजार १७० रुपैयाँका दरले रकम छुट्याएको थियो। प्रहरी अधिकारीका अनुसार पोशाक शीर्षकमा मात्रै करिब १ अर्ब रुपैयाँ निकासा भएको थियो।

यसका अतिरिक्त प्रहरी मुख्यालयले खटिएको स्थानमा जान–फर्कन तयारी खर्चबापत ८४८ रुपैयाँ तथा चारदिने तालिमका क्रममा खाजाका लागि एकमुष्ट १ हजार २०० रुपैयाँ उपलब्ध गराएको थियो। हाल विवादमा रहेको मुख्य विषय भने निर्वाचन प्रहरीको पोशाकका लागि छुट्याइएको रकम र त्यसअनुसार उपलब्ध गराइएको सामग्रीसँग सम्बन्धित छ। उपसमितिले खरिद प्रक्रिया, खर्च तथा पोशाकको गुणस्तरलगायत विषयमा अध्ययन गर्नेछ।

फेसबुक प्रतिक्रिया

लिंकहरु

निर्वाचन प्रहरीको पोशाक खरिदबारे संसदीय उपसमितिको पहिलो बैठक बस्दै

नबिन योगी दैलेखका उदाउँदो युवा नेता जनताका बिचमा लोकप्रिय आउँदो स्थानीय तहको निर्वाचनमा दुल्लु नगरको…

गोकुलगंगा–१ चुचुरेमा ट्र्याक्टर दुर्घटना, एक जनाको मृत्यु

मोडेल तथा गायिका रमिता भण्डारीको नयाँ म्युजिक भिडियो ‘तिमी निष्ठुरी भयौ’ सार्वजनिक

रामेछाप रास्वपामय बन्दैः डा. कृष्णहरि जनतासँग नेपाली काँगे्रस, एमाले, नेपाल कम्युनिष्ट पार्टी पछिपछि

च्याउ टिप्न गएका ढालबहादुर कार्की भालुको आक्रमणबाट गम्भीर घाइते

सायरी गोर्खाबाट रबि,बिक पाखा पखेरा संगको गहिरो सम्बन्ध

आचार्यकृत ‘’ऐतिहासिक नुवाकोट (भाग–१)’’सार्वजनिक

गजल समीक्षा तेज प्रकाश बानियाको कलमबाट

नम्रता गुरागाईँकृत निबन्धसङ्ग्रह ‘भूगोलका सपनाहरू’ लोकार्पण

जन आकाश मिडियाका सस्थापक आजिवन सदस्यको अध्यक्षता कार्यक्रम सप्पन्न

लिंकहरु