शुक्रबार, असोज ३० २०८३ | Friday 16th October 2026 
जन आकाश
काठमाडौं । नेपाल प्रहरीलाई प्रविधिमैत्री, आधुनिक र समयानुकूल बनाउन कृत्रिम बौद्धिकता (एआई), ड्रोन तथा एन्टि–ड्रोन प्रविधि र ठगी नियन्त्रणका लागि नयाँ संरचना विकास गर्ने योजना अघि बढाइएको प्रहरी महानिरीक्षक (आईजीपी) दानबहादुर कार्कीले बताएका छन् ।
शुक्रबार ७१औँ प्रहरी दिवसका अवसरमा आयोजित कार्यक्रममा बोल्दै आईजीपी कार्कीले अपराध अनुसन्धानलाई प्रभावकारी बनाउन र प्रहरी सेवाको गुणस्तर सुधार गर्न आधुनिक प्रविधिको प्रयोग विस्तार गरिने जानकारी दिए ।
उनका अनुसार प्रहरी संगठनको कार्यक्षमता अभिवृद्धि गर्न एआई तथा एड्भान्स्ड एनालिटिक्स सेल, एरियल सेक्युरिटीअन्तर्गत ड्रोन तथा एन्टि–ड्रोन युनिट र इन्टिग्रेटेड एन्टि–स्क्याम सेन्टरजस्ता नयाँ संरचना विकास गर्ने योजना अघि बढाइएको छ । यी संरचनाले अपराध नियन्त्रण, अनुसन्धान र प्रहरी सेवाको प्रभावकारिता बढाउन सहयोग पुग्ने उनको विश्वास छ ।
कार्कीले प्रहरी अस्पताललाई शिक्षण अस्पतालका रूपमा स्तरोन्नति गर्दै भविष्यमा नेपाल प्रहरी मेडिकल कलेज स्थापना गर्ने लक्ष्यसमेत अघि बढाइएको बताए । यसबाट प्रहरी कर्मचारी, उनीहरूका परिवार तथा सर्वसाधारणलाई गुणस्तरीय स्वास्थ्य सेवा उपलब्ध गराउन सहयोग पुग्ने उनको भनाइ थियो ।
प्रहरी संगठनलाई थप प्रभावकारी, अनुशासित र उत्तरदायी बनाउन आदेश शृङ्खला, अनुशासन, जवाफदेहिता र आपसी समन्वय आवश्यक रहेको उनले उल्लेख गरे ।
‘नेपाल प्रहरीको सुधारमा योगदान पुर्याउने सञ्चारकर्मी, नागरिक समाज, समुदाय र सबै शुभेच्छुकप्रति आभार व्यक्त गर्दछु,’ कार्कीले भने, ‘अमर प्रहरीहरूको बलिदानलाई सम्मान गर्दै नागरिकमैत्री, उत्तरदायी र प्रविधिमैत्री प्रहरी संगठन निर्माण गर्ने प्रतिबद्धता दोहोर्याउँछु ।’
उनले प्रहरी संगठनको सुधार र प्रभावकारिता अभिवृद्धिका लागि सबै पक्षको सहयोग र समन्वय आवश्यक रहेकोमा जोड दिए । ७१औँ प्रहरी दिवसका अवसरमा आयोजित समारोहमा उत्कृष्ट कार्यसम्पादन गर्ने प्रहरी कर्मचारीहरूलाई पुरस्कृतसमेत गरिएको थियो
© 2026 All right reserved to janaaakash.com | Site By : SobizTrend
