सोमबार, कार्तिक १० २०८३ | Monday 26th October 2026 
जन आकाश
काठमाडौं । इन्टरनेटबाटै घरजग्गाको नक्सा हेर्न र आफैं प्रिन्ट गर्न मिल्ने सेवा नापी बिभागले शुरु गरेको छ । नापी विभागमा बिहीबार आयोजित औपचारिक समारोहबाट प्रधानमन्त्री केपी शर्मा ओलीले यो व्यवस्थाको शुभारम्भ गर्ने छन् ।
यो व्यवस्था कार्यान्वयनमा आएपछि आफ्नो घर जग्गाको नक्सा प्रिन्ट गर्न र त्यसवाफतको शुल्क बुझाउन कार्यालय धाइरहनु नपर्ने विभागले जनाएको छ । ‘मेरो कित्ता डट जिओभी डट एनपी’ लगइन गरेर यो सेवा लिन सकिने विभागका अधिकारीको भनाइ छ ।
नापी विभागका सूचना अधिकारी दामोदर ढकालले सेवाग्राहीलाई सहजरुपमा छिटोछरितो सेवा दिन तथा प्रविधिमैत्री बनाउन यो सेवा सुरु गरिएको बताए ।
काहाँ काहाँवाट हुदै छ त यो सुविधा ?
सूचना अधिकारी ढकालका अनुसार बिहीबार यो सेवा काठमाडौं उपत्यकाका डिल्लीबजार, कलंकी र भक्तपुरको कार्यालयमा लागु हुने छ । त्यसपछि क्रमशः देशभर कार्यान्वयनमा ल्याइने विभागले जनाएको छ ।
‘बिहिवार नै सेवा पाउने भनेको डिल्लीबजार, कलंकी र भक्तपुरबाट हो,’ सूचना अधिकारी ढकालले भने, ‘एक हप्ताभित्र काठमाडौं उपत्यकाभरी र त्यसपछि क्रमशः देशैभरका १२६ वटा नापी कार्यालयबाट मेरो कित्ता सेवा सुरु हुन्छ ।’ उनले जानकारी दिए अनुसार अव देशभरका नागरिकले आफ्नो कित्ता लगइन गरेर घरमै बसेर सवै कुरा हेर्न मिल्ने बनाएको हो ।
© 2026 All right reserved to janaaakash.com | Site By : SobizTrend
