पद्मावती सिंहलाई ‘कविडाँडा सुवर्ण तुलसी काव्य पुरस्कार’ समर्पण

-जयराम बिडारी

कार्तिक ८, काठमाडौँ
कवि तथा गीतकार सरला श्रेष्ठद्वारा आफ्ना मातापिता सुवर्णजङ्ग श्रेष्ठ र तुलसीदेवी श्रेष्ठको नाममा स्थापित ‘कविडाँडा सुवर्ण-तुलसी काव्य पुरस्कार २०८२’ एक भव्य समारोहका बिच वरिष्ठ स्रष्टा पद्मावती सिंहलाई अर्पण गरिएको छ ।

ललितपुरस्थित होटल साङ्ग्रिला ब्लुमा आयोजित उक्त विशेष कार्यक्रम कवि तथा कथाकार एल.बी. क्षेत्रीको अध्यक्षता एवम् मदन पुरस्कार विजेता प्रख्यात कवि गोपाल पराजुलीको प्रमुख आतिथ्यमा सम्पन्न भएको हो ।

कार्यक्रमको औपचारिक उद्घाटन प्रमुख अतिथि पराजुलीद्वारा पानसमा दीप प्रज्वलन गरि औपचारिक समुद्घाटन गरेका थिए ।

समारोहमा सङ्गीतकार राजु सिंहले स्वागत मन्तव्य व्यक्त गरेका थिए, भने डा. सृजना शर्माद्वारा पुरस्कृत व्यक्तित्व पद्मावती सिंहका साहित्यिक ,साङ्गीतिक , पाटोहरुलाई प्रभावकारी रुपमा प्रस्तुत गर्दै उनका साहित्यिक एवं कृतित्वमाथि प्रभावकारी रुपमा प्रकाश पारेकी थिइन् ।

सो अवसरमा वरिष्ठ सञ्चारकर्मी प्रकाश सायमी, साहित्यकार मातृका पोखरेल र भागिरथी श्रेष्ठ लगायतका विशिष्ट व्यक्तित्वहरूले शुभकामना व्यक्त गर्दै सम्मानित स्रष्टा सिंहको सक्रिय र सार्थक लेखनको कामना गरेका थिए ।

पुरस्कृत व्यक्तित्व पद्मावती सिंह २००४ सालमा काठमाडौँको ओमबहालमा जन्मिनुभएकी हुन् । ‘पत्थरका देवता’ कथा मार्फत सिंहको साहित्यिक क्षेत्रमा प्रवेश भएको पाइन्छ । लेखन, गायन तथा साहित्यका विविध विधामा दशकौँदेखि निरन्तर सक्रिय रहँदै आउनुभएकी सिंहलाई सम्मान गर्न पाउँदा संस्थाले गौरव महसुस गरेको कार्यक्रममा जनाइएको थियो ।

कार्यक्रमको अर्को मुख्य आकर्षणका रूपमा स्रष्टा सरला श्रेष्ठको शब्द तथा पद्मावती सिंहको स्वर, कृष्णदेव रुपाखेतीद्वारा निर्देशित,हरीश कल्पित एवं अनु श्रेष्ठको जीवन्त अभिनय रहेको र राजु सिंहद्वारा संगीतवद्ध म्युजिक भिडियो ‘म मौन रहिरहें’ समेत लोकार्पण गरिएको थियो ।

उक्त कार्यक्रमका सशक्त कविहरु विश्व विमोहन श्रेष्ठ, सरला श्रेष्ठ, उषा शेरचन र डा. गीता त्रिपाठी लगायतले आ-आफ्ना उत्कृष्ट रचना वाचन गरि कार्यक्रमलाई काव्यमय तुल्याएका थिए ।
सो समारोहमा प्रमुख अतिथि गोपाल पराजुलीले सर्जकलाई सम्मान र पूजा गर्ने यस्तो पवित्र कार्यमा साक्षी बन्न पाउँदा खुसी व्यक्त गर्दै पुरस्कृत व्यक्तित्व सिंहलाई शुभकामना व्यक्त गरे ।
सयौँको सङ्ख्यामा विशिष्ट साहित्यकारहरूको उपस्थिति रहेको उक्त भव्य समारोहको समापन सभापति एल.बी. क्षेत्रीद्वारा आफ्ना कविता वाचनसहित गरिएको थियो । भने कार्यक्रमको सहजीकरण सिर्जना शर्माद्वारा कुशलतापूर्वक गरिएको थियो ।