मंगलबार, भाद्र २३ २०८३ | Tuesday 8th September 2026 
जन आकाश
काठमाडौं । वैदेशिक रोजगार व्यवसायी संघले मलेसियाले नेपालबाट श्रमिक लैजान सूचीकृत गरेका २५ म्यानपावर कम्पनीमध्ये दुईवटामा सांकेतिक कारबाहीस्वरूप ताला लगाएको छ।
संघका अध्यक्ष डिकबहादुर खत्रीले आइतबार काठमाडौंमा आयोजित पत्रकार सम्मेलनमार्फत एसिया लिंक सर्भिसेज प्रालि र ट्रस्ट नेपाल ओभरसिज प्रालिमा ताला लगाइएको जानकारी दिए। मलेसियाले श्रमिक लैजाने प्रक्रियामा सिन्डिकेट लागू गर्न खोजेको र त्यसमा सहयोग गरेको आरोपमा ती कम्पनीमा ताला लगाइएको संघले जनाएको छ।
मलेसियाले आप्रवासी श्रमिक केन्द्रिकृत व्यवस्थापन प्रणाली (एफडब्लुसिएमएस)मार्फत नेपालबाट २५ वटा म्यानपावर कम्पनी सूचीकृत गरी ती कम्पनीबाट मात्रै श्रमिक लैजाने व्यवस्था अघि बढाएपछि व्यवसायी संघले विरोध जनाएको हो।
मलेसियाले नेपालसहित बंगलादेश, श्रीलंका, म्यानमार, पाकिस्तान, थाइल्याण्ड, कम्बोडिया, भियतनाम, भारत र फिलिपिन्स गरी १० स्रोत मुलुकका म्यानपावर कम्पनीलाई उक्त प्रणालीमा सूचीकृत गरेको छ। मलेसियाको मानव संसाधन मन्त्रालयले सूचीकृत कम्पनीबाहेक अन्य म्यानपावरमार्फत श्रमिक नलैजाने जनाएको छ।
नेपाल र मलेसियाबीच द्विपक्षीय श्रम सम्झौता भए पनि मलेसियाले एकतर्फी रूपमा २५ वटा म्यानपावर कम्पनी तोकेको भन्दै व्यवसायीहरूले असन्तुष्टि जनाएका छन्। यसबारे अन्य म्यानपावर व्यवसायी तथा सरकारलाई समेत पर्याप्त जानकारी नदिइएको उनीहरूको दाबी छ।
श्रम मन्त्रालयले भने यस विषयमा नेपालका लागि मलेसियाली कार्यवाहक राजदूतसँग छलफल गरिसकेको र परराष्ट्र मन्त्रालयमार्फत कूटनीतिक नोट पठाइसकेको जनाएको छ।
समस्याबारे छलफल गर्न सोमबार मन्त्रालयले संघको रोहबरमा सूचीकृत २५ वटै म्यानपावर व्यवसायीलाई बोलाएको छ। उक्त छलफलपछि थप २३ म्यानपावर कम्पनीमा पनि ताला लगाउने वा अहिले लगाइएको ताला खोल्ने भन्ने विषयमा स्पष्ट धारणा सार्वजनिक गर्ने अध्यक्ष खत्रीले बताएका छन्।
वैदेशिक रोजगारीमा श्रमिक पठाउने विषयमा सबै व्यवसायीको समान अधिकार हुनुपर्ने र कुनै पनि कम्पनीलाई एकाधिकार दिन नहुने संघको भनाइ छ।
© 2026 All right reserved to janaaakash.com | Site By : SobizTrend
