देशभर सूक्ष्म पोषक तत्त्वको अवस्था अध्ययन गरिने, १२ हजारभन्दा बढी नागरिक सर्वेक्षणमा समेटिँदै

स्वास्थ्य तथा खाद्य स्वच्छता मन्त्रालयअन्तर्गतको परिवार कल्याण महाशाखाको नेतृत्वमा सञ्चालन हुने सर्वेक्षणले देशको वर्तमान पोषण अवस्थाबारे राष्ट्रिय तथा प्रदेशस्तरको अद्यावधिक तथ्याङ्क उपलब्ध गराउनेछ।

सन् २०१६ मा सम्पन्न राष्ट्रिय सूक्ष्म पोषक तत्त्व अवस्था सर्वेक्षणको करिब एक दशकपछि हुन लागेको यस अध्ययनले विगतका उपलब्धि, विद्यमान पोषण समस्या र आगामी प्राथमिकता पहिचान गर्न सहयोग पुर्‍याउने अपेक्षा गरिएको छ।

सर्वेक्षणमार्फत भिटामिन ‘ए’, भिटामिन ‘बी१२’, आइरन, आयोडिन, जिङ्क र फोलेटलगायत शरीरका लागि आवश्यक सूक्ष्म पोषक तत्त्वको अवस्था परीक्षण गरिनेछ। यसका साथै रक्तअल्पता, संक्रमणसँग सम्बन्धित सूचक, शारीरिक वृद्धि तथा पोषण अवस्था र सरकारले सञ्चालन गरेका प्रमुख पोषण कार्यक्रमको पहुँच एवं सेवाग्राहीको सहभागितासमेत अध्ययन गरिनेछ।

सन् २०२६ अप्रिलदेखि सन् २०२७ मार्चसम्म सञ्चालन हुने सर्वेक्षण देशका सातवटै प्रदेश तथा हिमाल, पहाड र तराईका तीनवटै भौगोलिक क्षेत्रमा पुग्नेछ। यसका लागि २८० वटा क्लस्टर छनोट गरी ८ हजार ४०० घरपरिवारका करिब १२ हजार २३६ जनालाई सर्वेक्षणमा समेटिनेछ।

सर्वेक्षणमा घरमूली, १५ देखि ४९ वर्ष उमेर समूहका महिला, १० देखि १९ वर्षका किशोरकिशोरी, ६ देखि ९ वर्षका बालबालिका तथा ६ देखि ५९ महिनासम्मका बालबालिकाको पोषण अवस्था अध्ययन गरिनेछ। गर्भवती महिलालाई समेत सर्वेक्षणमा समावेश गरिनेछ।

सर्वेक्षण प्रभावकारी रूपमा सञ्चालन गर्न गुणस्तर नियन्त्रक, तथ्याङ्क संकलक, सुपरिवेक्षक, अन्तर्वार्ताकार, रक्त नमुना संकलक, प्रयोगशाला प्राविधिक तथा नमुना ढुवानीमा संलग्न गरी २०५ जना जनशक्ति परिचालन गरिनेछ। परिचालित जनशक्तिका लागि नोभेम्बर १७ देखि २८ सम्म तालिम सञ्चालन गरिने कार्यक्रम छ।

यसअघि सन् २०१६ मा गरिएको सर्वेक्षणले विभिन्न उमेर समूहका नागरिकमा सूक्ष्म पोषक तत्त्वको कमी र रक्तअल्पताको अवस्था उजागर गरेको थियो। त्यसयता सरकारले पोषण सुधारका लागि विभिन्न कार्यक्रम सञ्चालन गर्दै आएको छ।

नयाँ सर्वेक्षणबाट प्राप्त तथ्याङ्कले विगतमा सञ्चालन गरिएका पोषण कार्यक्रमको प्रभावकारिता मूल्याङ्कन गर्न तथा आगामी दिनमा पोषणसम्बन्धी नीति, योजना र कार्यक्रम निर्माणलाई थप प्रभावकारी बनाउन महत्वपूर्ण आधार प्रदान गर्ने अपेक्षा गरिएको छ। यसले विशेषगरी बालबालिका, किशोरकिशोरी तथा महिलाको पोषण अवस्था सुधारका लागि आवश्यक रणनीति तय गर्न सहयोग पुग्ने विश्वास गरिएको छ।