मंगलबार, भाद्र २३ २०८३ | Tuesday 8th September 2026 
जन आकाश
काठमाडौं । भारतीय प्रधानमन्त्री नरेन्द्र मोदीलाई कालोझण्डा देखाउने योजना बनाएको भन्दै ग्रेटर नेपालका अध्यक्ष फणिन्द्र नेपाललाई प्रहरीले गिरफ्तार गरेको छ । नेपाललाई सादा पोशाकमा आएका प्रहरीले बिहीबार बिहान आफ्नै निवासबाट गिरफ्तार गरेको हो ।
‘अध्यक्ष नेपाललाई बिहीबार बिहानै चावहिल घरैबाट सादा पोशाक आएको सात जनाको टोलीले गिरफ्तार गरी लगेको हो’ गे्रटर नेपालका महासचिव रामचन्द्र खडकाले भने । महासचिव खड्काले गिरफ्तारीको निन्दा गर्दै तुरुन्त रिहा गर्न सरकारसँग माग गरेका छन् ।
आज मोदी आउने समयमा विमानस्थल बाहिरको सडकमा कालो झण्डा देखाउने तयारी गरेको सूचना प्राप्त भएको भन्दै गिरफ्तार गरी हिरासतमा राखिएको जनाइएको छ । ग्रेटर नेपालले सुगौली सन्धि अघिका सबै भू–भाग भारतले नेपाललाइ फिर्ता गर्नुपर्ने माग राख्दै निरन्तर संघर्ष गर्दै आइरहेको छ । यसअघि मोदी नेपाल भ्रमणमा आएका बेला त्रिभुवन अन्तर्राष्ट्रिय विमानस्थलमा कालो झण्डासहित विरोध प्रदर्शन गरेको थियो । उक्त प्रदर्शनका क्रममा ग्रेटर नेपालका महासचिव रामचन्द्र खडकासहितलाई एयरपोर्टबाटै गिरफ्तार गरी पछि रिहा गरिएको थियो ।
यस अघि भारतीय प्रधानमन्त्री मोदी जनकपुर र मुक्तिनाथको धार्मिक भ्रमणमा आउँदा पनि नेपाललाई प्रहरीले पक्राउ गरेर तीन दिन हिरासतमा राखेपछि रिहा गरेको थियो । उनलाई यो पटक पनि विमस्टेक सम्मेलन अवधिभर थुनामै राख्ने जानकारी प्रहरी स्रोतले दिएको छ ।
© 2026 All right reserved to janaaakash.com | Site By : SobizTrend
