रास्वपा रिफर्मेसनका लागि तोसिमाको चार बुँदे मार्गचित्र

उनले पेस गरेको मार्गचित्रमा पार्टीको महाधिवेशनदेखि वैचारिक पुनर्संरचनासम्मका विषय समेटेर नेतृत्वलाई स्पष्ट निर्णयका साथ अघि बढ्नुपर्ने उल्लेख छ । कार्कीले पहिलो बुँदामा महाधिवेशनलाई पार्टीको ‘अक्सिजन’ भन्दै २०८२ मङ्सिरमै सम्पन्न गर्नुपर्ने प्रस्ताव राखेकी छन् ।

महाधिवेशनले सङ्गठन विस्तार, वैचारिक स्पष्टता र चुनावी तयारीमा नयाँ ऊर्जा थप्ने उनको विश्वास छ । कार्कीले वर्तमान कार्यकारी नेतृत्व (पदाधिकारी तथा सचिवालय) भङ्ग गरी केन्द्रीय समितिलाई महाधिवेशन आयोजक समितिमा रूपान्तरण गर्नुपर्ने, समितिमा जेनजी, वैकल्पिक शक्तिहरू र बौद्धिक वर्गको प्रतिनिधित्व हुनुपर्ने पनि बताएकी छन् ।

‘महाधिवेशन आयोजक समिति घोषणापछि पनि केन्द्रीय सचिवालय र पदाधिकारी रहिरहनु र सचिवालय विस्तार समेत गरिनुको आधार स्पष्ट नभएको मेरो बुझाइ छ,’ उनले भनेकी छन्, ‘महाधिवेशनका लागि सकारात्मक वातावरण निर्माण गर्न पार्टीको मौजुदा कार्यकारी नेतृत्व (पदाधिकारी तथा सचिवालय) भङ्ग गरी केन्द्रीय समितिलाई महाधिवेशन आयोजक समितिमा रूपान्तरण गर्नु पर्दछ ।’

कार्कीले देशको वर्तमान र भविष्यलाई साँच्चिकै नेतृत्व गर्न सक्ने राजनीतिक शक्ति निर्माण गर्नु आजको अपरिहार्य आवश्यकता भएको भन्दै यसका लागि राष्ट्रिय स्वतन्त्र पार्टीको पनि रूपान्तरण आवश्यक रहेकोमा जोड दिएकी छन् । ‘पार्टीको नेतृत्व, सिद्धान्त, नीति, कार्यक्रम आदि सबै आयामको पुनरावलोकन, पुनःमूल्यांकन र पुनर्संरचना गरेर आजको समयले खोजेको मध्यमार्गी राजनैतिक शक्ति निर्माणको लागि अहिले नै उपयुक्त समय हो’, कार्कीको मार्गचित्रमा भनिएको छ ।

बैठकमा कार्कीसहित पाँच जना सदस्यले सुझावसहितको प्रतिवेदन पेस गरेका थिए । केन्द्रीय सङ्गठन विभागका सचिव शंकर श्रेष्ठले सबैभन्दा लामो २० पृष्ठको सुझावसहितको प्रतिवेदन दर्ता गराएका छन् । यस्तै, केन्द्रीय सदस्यहरू डा। बुद्धि शर्मा र मधु अर्यालले तीन–तीन पृष्ठको दस्ताबेजसहितको प्रस्ताव दर्ता गराएका छन् ।