बिहिबार, भाद्र २५ २०८३ | Thursday 10th September 2026 
जन आकाश
काठमाडौं । सम्पत्ति शुद्धीकरणमा तानिएका पूर्वप्रधानमन्त्री शेरबहादुर देउवा र पूर्वपरराष्ट्रमन्त्री डा। आरजु राणाविरुद्ध पक्राउ पूर्जी जारी भएको छ। जिल्ला अदालत काठमाडौंबाट मंगलबार पक्राउ पूर्जी जारी गरिएको हो। देउवा दम्पतिविरुद्ध सम्पत्ति शुद्धीकरण विभागले अनुसन्धान गरिरहेको छ। सम्पत्ति शुद्धीकरणका विषयमा बयान गर्नुपर्ने भएपछि देउवा दम्पतिविरुद्ध अदालतबाट पक्राउ पूर्जी जारी गर्न लगाएको स्रोतले बतायो।
जेनजी आन्दोलनपछि बनेको सुशीला कार्की नेतृत्वको सरकारले नै देउवा दम्पतिमाथि अनुसन्धान गर्न विभागलाई निर्देशन दिएको थियो। त्यसपछि विभागले अनुसन्धान सुरु गरेको थियो। चैत १३ गते बालेन्द्र शाहको नेतृत्वमा सरकार गठन भएपछि यसलाई झन् तीब्रता दिइएको छ।
सम्पत्ति शुद्धीकरणको अनुसन्धानका लागि विभागको सिफारिसका आधारमा नेपाल प्रहरीको केन्द्रीय अनुसन्धान ब्युरो (सीआइबी)ले पूर्वउर्जामन्त्री दीपक खड्कालाई चैत १५ गते पक्राउ गरेको थियो।
विभागले अहिले खड्काका अलावा पूर्वप्रधानमन्त्री केपी शर्मा ओली, शेरबहादुर देउवा र पुष्पकमल दाहाल तथा पूर्वपरराष्ट्रमन्त्री आरजुमाथि अनुसन्धान गरिरहेको छ। पूर्वप्रधानमन्त्री ओली चैत १४ देखि हिरासतमा छन्। भदौ २३ र २४ गतेको घटनामा जाँचबुझ आयोगको सिफारिसका आधारमा ओली पक्राउ परेका थिए।
देउवा भने उपचारका लागि भन्दै चुनाव समेत छाडेर फागुन १३ गते सिंगापुर उडेका थिए। त्यसको केही दिनमा उनी हङकङ गएका हुन्। आरजु भने भारतबाट सिंगापुर पुगेकी थिइन्।
दौ २४ गते जेनजी आन्दोलनका क्रममा देउवाको बुढानीलकण्ठ निवास आगजनीमा परेको थियो। घरभित्र ठूलो मात्रामा पैसा जलेको देखिएपछि विभागले घरमा भेटिएका डढेका नोट र अन्य प्रकरण जोडेर देउवा दम्पतिमाथिमाथि अनुसन्धान गरिरहेको छ।
विभागको टोलीले जलेको घरमा पुगेर नोटका टुक्रा र खरानी समेत ल्याएको थियो। देउवाले घटनाको ७ महिनापछि घर भत्काउन लगाएकामा प्रमाण लोप हुने भन्दै जिल्ला प्रशासन कार्यालय काठमाडौंले रोक लगाएको छ। पक्राउ पूर्जी जारी भएसँगै विदेशमा रहेका देउवा दम्पतिविरुद्ध प्रहरीले अब इन्टरपोलमार्फत नोटिस जारी गर्नेछ।
© 2026 All right reserved to janaaakash.com | Site By : SobizTrend
