बाम एकताको आधार: नयाँ नेतृत्व, नयाँ सोच र जनविश्वास

काठमाडौं । आजकल सामाजिक सञ्जालमा पुनः बाम एकताको विषय व्यापक रूपमा चर्चा हुन थालेको छ। विगतमा भएका विभाजन, आपसी विवाद र नेतृत्वका कमजोरीप्रति कतिपय नेताहरूले अहिले पछुतो व्यक्त गरिरहेका पनि देखिन्छन्। तर केवल पछुतो व्यक्त गर्दैमा जनताको विश्वास पुनः प्राप्त गर्न सकिँदैन। लामो समयसम्म देशको नेतृत्व गरिसकेका र अहिले वृद्धभत्ता खाने तथा सार्वजनिक जिम्मेवारीभन्दा विश्रामको चरणमा पुगिसकेका नेताहरूबाट फेरि पनि नेपाली जनताले ठूलो परिवर्तनको अपेक्षा गर्ने आधार कमजोर बन्दै गएको छ।

विगतका अनुभवले देखाएको छ कि व्यक्तिगत स्वार्थ, भ्रष्ट आचरण, गुटबन्दी, अवसरवाद र सत्ता केन्द्रित राजनीतिका कारण जनताको विश्वास कमजोर भएको हो। त्यसैले अब केवल बाम एकताको नारा मात्र होइन, नेतृत्व, कार्यशैली, विचार र व्यवहारमा पनि नयाँपन आवश्यक छ। जनताले आज इमानदार, सक्षम, दूरदर्शी, उत्तरदायी र समयअनुसार सोच्न सक्ने नेतृत्व खोजिरहेका छन्।

त्यसैले अब नयाँ पुस्ताका सक्षम, अध्ययनशील, स्वच्छ छवि भएका, राजनीतिक, सामाजिक, आर्थिक तथा वैचारिक रूपमा परिपक्व युवा नेताहरूलाई नेतृत्व हस्तान्तरण गर्ने समय आएको छ। देशलाई रूपान्तरण गर्न सक्ने, सुशासन स्थापित गर्न सक्ने, भ्रष्टाचारविरुद्ध दृढ रूपमा उभिन सक्ने र जनताको अधिकार सुनिश्चित गर्न सक्ने नेतृत्वबाट मात्र बाम एकताको वास्तविक उद्देश्य पूरा हुन सक्छ।

यसर्थ, नेतृत्व चयनमा उमेरभन्दा पनि क्षमता, इमानदारी, कार्यकुशलता र जनविश्वासलाई प्राथमिकता दिनुपर्छ। ७० वर्ष वा सोभन्दा माथिका अनुभवी नेताहरू तथा पूर्वप्रधानमन्त्रीहरूलाई पार्टीका संरक्षकका रूपमा सम्मानजनक भूमिका दिइनुपर्छ। त्यसैगरी लामो समयदेखि पार्टी निर्माणमा योगदान दिएका वरिष्ठ नेता तथा कार्यकर्ताहरूलाई सल्लाहकारको जिम्मेवारी दिई उनीहरूको अनुभवलाई संस्थागत रूपमा उपयोग गर्नुपर्छ। यसरी अनुभव र युवाशक्तिको समन्वय हुन सके मात्र पार्टी बलियो र प्रभावकारी बन्न सक्छ।

यदि बाम शक्तिहरूले व्यक्तिगत स्वार्थभन्दा माथि उठेर राष्ट्रिय हितलाई केन्द्रमा राख्दै वास्तविक एकता कायम गर्न सके भने उनीहरूले पुनः जनताको विश्वास जित्ने अवसर प्राप्त गर्न सक्छन्। तर त्यसका लागि फेरि पार्टी विभाजन नगर्ने, आपसी सम्मान कायम राख्ने र लोकतान्त्रिक संस्कृतिलाई आत्मसात गर्ने सार्वजनिक प्रतिबद्धता आवश्यक छ।

त्यसैगरी भ्रष्टाचार नगर्ने, भ्रष्टाचारमा संलग्न व्यक्ति, बिचौलिया, माफिया, ठग, दलाल तथा राज्यको स्रोत–साधनको दुरुपयोग गर्ने समूहविरुद्ध कानुनअनुसार कठोर कदम चाल्ने स्पष्ट प्रतिबद्धता पनि हुनुपर्छ। राज्य सञ्चालनमा पारदर्शिता, जवाफदेहिता र सुशासनलाई पहिलो प्राथमिकतामा राख्नुपर्छ।

राष्ट्रिय सुरक्षा, राष्ट्रिय एकता, सार्वभौमसत्ता र नेपालको अखण्डताको संरक्षण गर्दै आर्थिक समृद्धि, विकास निर्माण, औद्योगिकीकरण, कृषि आधुनिकीकरण, उत्पादनमुखी अर्थतन्त्र तथा युवाका लागि स्वदेशमै सम्मानजनक रोजगारी सिर्जना गर्ने दीर्घकालीन योजना आवश्यक छ। साथै प्रत्येक नागरिकका लागि गुणस्तरीय शिक्षा, सहज स्वास्थ्य सेवा, सामाजिक सुरक्षा तथा ज्येष्ठ नागरिकप्रति सम्मानजनक व्यवहार सुनिश्चित गर्नुपर्छ।

जनताले अब भाषणभन्दा काम हेर्न चाहन्छन्। नारा होइन, परिणाम चाहन्छन्। यदि बाम एकता केवल सत्ता प्राप्तिको माध्यम नभई राष्ट्र निर्माण, सुशासन, सामाजिक न्याय र जनकल्याणको साझा अभियानका रूपमा अघि बढ्छ भने मात्र नेपाली जनताले त्यसलाई विश्वास गर्नेछन्। अन्यथा विगतका गल्ती दोहोरिएमा जनताले फेरि पनि विकल्प खोज्नेछन्।

अन्ततः बाम एकताको सफलता केवल दलहरू एक ठाउँमा उभिनुमा होइन, उनीहरूले जनताप्रति कति इमानदार, उत्तरदायी र परिणाममुखी भएर काम गर्छन् भन्ने कुरामा निर्भर रहनेछ।