सामसङ इनोभेसन क्याम्पसद्वारा कोडिङ ग्र्याजुएट सम्मान, नेपालमा एआई कार्यक्रमका लागि आवेदन खुला

डिसेम्बर २२, २०२५ देखि जुन ३०, २०२६ सम्म सञ्चालन भएको कोडिङ तथा प्रोग्रामिङ कोर्समा सहभागी विद्यार्थीहरूले प्राविधिक सीप, व्यावहारिक परियोजना अनुभव र उद्योगसँग सम्बन्धित ज्ञान हासिल गरेका थिए। कार्यक्रम सफलतापूर्वक पूरा गर्ने विद्यार्थीहरूलाई आयोजित विशेष समारोहमा सम्मान गरिएको थियो।

सामसङ नेपालका प्रबन्ध निर्देशक चाङ उक जङले नेपालका युवामा रहेको सम्भावनालाई प्रविधि शिक्षामार्फत उजागर गर्न सामसङ इनोभेसन क्याम्पसले महत्वपूर्ण भूमिका खेलिरहेको बताउनुभयो।

“आर्टिफिसियल इन्टेलिजेन्सले हरेक उद्योगलाई परिवर्तन गरिरहेको अवस्थामा डिजिटल प्रतिभाको विकास अझ आवश्यक बनेको छ। सामसङ इनोभेसन क्याम्पसमार्फत युवाहरूलाई सीप, आत्मविश्वास र नवीन सोच प्रदान गरी नेपालको डिजिटल भविष्य निर्माणमा सहयोग गरिरहेका छौं,” उहाँले भन्नुभयो।

सामसङको विश्वव्यापी कर्पोरेट सामाजिक उत्तरदायित्व (CSR) दृष्टिकोण ‘Together for Tomorrow! Enabling People’ अन्तर्गत सन् २०२३ मा नेपालमा सुरु भएको सामसङ इनोभेसन क्याम्पसले युवाहरूलाई उदीयमान प्रविधिमा उद्योगअनुकूल सीप प्रदान गर्दै आएको छ।

कम्पनीका अनुसार नयाँ एआई कार्यक्रमले सहभागीहरूलाई कृत्रिम बुद्धिमत्ता प्रविधिको ज्ञान, समस्या समाधान क्षमता र व्यावहारिक अनुभव प्रदान गर्नेछ। वास्तविक विश्वका चुनौतीमा आधारित यस पाठ्यक्रमले नेपालमा एआई दक्ष जनशक्ति विकास गर्न र नवप्रवर्तनलाई प्रोत्साहन गर्ने लक्ष्य राखेको छ।

कार्यक्रमपछि पनि सामसङ नेपालले ग्र्याजुएटहरूलाई करियर मार्गदर्शन, उद्योग विशेषज्ञबाट मेन्टरसिप र नवप्रवर्तन परियोजनामार्फत सहयोग जारी राख्ने जनाएको छ।

सामसङले भविष्यमा ‘सामसङ इनोभेसन क्याम्पस अल्मुनाई नेटवर्क’ स्थापना गर्ने योजना समेत अघि सारेको छ। यस नेटवर्कमार्फत पूर्व सहभागीहरूलाई एक–आपसमा जोडिन, निरन्तर सिकाइमा सहभागी हुन र नयाँ पुस्ताका विद्यार्थीलाई मार्गदर्शन गर्न अवसर प्रदान गरिनेछ।

सामसङले नेपालको एआई इकोसिस्टम विकास, रोजगारीका अवसर विस्तार र डिजिटल रूपान्तरणलाई गति दिन शिक्षण संस्था, उद्योग तथा सरकारबीच सहकार्य आवश्यक रहेको जनाएको छ।