मंगलबार, भाद्र २३ २०८३ | Tuesday 8th September 2026 
जन आकाश
काठमाडौं । भोटेकोशी नदीमा आएको विनाशकारी बाढीमा परी मृत्यु हुनेको संख्या १ हजार नाघेको छ। नेपाल प्रहरीले बुधबार बिहान ८ बजेसम्मको अद्यावधिक विवरण सार्वजनिक गर्दै बाढीमा परी हालसम्म १ हजार १० जनाको शव फेला परेको जनाएको हो।
प्रहरीका अनुसार फेला परेका शवमध्ये हालसम्म ५६ वटा मात्र परिवारलाई बुझाइएको छ। पहिचान तथा अन्य प्रक्रिया पूरा हुन नसकेका ५८१ शवलाई जमिनमा गाडेर व्यवस्थापन गरिएको छ।
बाढीपछि ठूलो संख्यामा मानिस अझै बेपत्ता छन्। प्रहरीको तथ्यांकअनुसार हालसम्म ४ हजार ५९९ जना सम्पर्कविहीन रहेका छन्। बेपत्ताको संख्या ठूलो रहेकाले मृतकको संख्या अझै बढ्न सक्ने देखिएको छ।
बाढीबाट प्रभावित तथा विस्थापितमध्ये ३ हजार ४५३ जना हाल विभिन्न होल्डिङ सेन्टरमा रहेका छन्। उनीहरूलाई तत्कालीन आवास, खाद्यान्न, स्वास्थ्य उपचार तथा अन्य आवश्यक सहायता उपलब्ध गराउने काम भइरहेको छ।
बाढीबाट रसुवा, नुवाकोट, धादिङ, सिन्धुपाल्चोक, नवलपरासी लगायतका जिल्लामा ठूलो जनधनको क्षति भएको छ। विशेषगरी भोटेकोशी र आसपासका क्षेत्रमा आएको बाढीले जलविद्युत् आयोजना, सडक, पुल, घर तथा अन्य भौतिक संरचनामा व्यापक क्षति पुर्याएको छ।
बाढीमा बेपत्ता भएकाहरूको खोजी तथा प्रभावितको उद्धारका लागि नेपाली सेना, नेपाल प्रहरी र सशस्त्र प्रहरीको टोली परिचालन भइरहेको छ। कठिन भौगोलिक अवस्था, क्षतिग्रस्त सडक तथा पुल र नदीमा बढेको पानीको बहावका कारण खोज तथा उद्धार कार्य चुनौतीपूर्ण बनेको छ।
यसैबीच, पहिचान हुन नसकेका शवको डीएनए नमुना, फिंगरप्रिन्ट तथा अन्य विवरण सुरक्षित राखेर पहिचानको प्रक्रिया अघि बढाइएको छ। परिवारसँग समन्वय गरी पहिचान खुलेका शव क्रमशः आफन्तलाई बुझाउने काम भइरहेको प्रहरीले जनाएको छ।
बाढीबाट ठूलो संख्यामा नागरिक बेपत्ता रहेको र सयौँ शवको अझै पहिचान हुन नसकेको अवस्थामा सरकार तथा सुरक्षा निकायमाथि खोज, उद्धार, शव पहिचान, राहत र पुनःस्थापनाको कामलाई थप प्रभावकारी बनाउनुपर्ने दबाब बढेको छ।
© 2026 All right reserved to janaaakash.com | Site By : SobizTrend
