पृथ्वी राजमार्ग ८ दिनदेखि अवरुद्ध, काठमाडौंमा ग्यासको अभाव झन् चुलिँदै

पृथ्वी राजमार्गअन्तर्गत धादिङको कृष्णभीरमा पहिरो खसेपछि काठमाडौं भित्रिने मुख्य सडक अवरुद्ध भएको हो। सडक अवरुद्ध हुँदा उपत्यकातर्फ आउँदै गरेका खाना पकाउने ग्यास, पेट्रोलियम पदार्थ र अन्य अत्यावश्यक सामग्री बोकेका सवारीसाधन बाटोमै रोकिएका छन्।

खाद्यान्न आपूर्तिमा परेको असर तत्कालै ठूलो रूपमा नदेखिए पनि लामो समयदेखि समस्या रहँदै आएको खाना पकाउने ग्यासको अभाव भने झन् चुलिन थालेको छ। सडक अवरुद्ध भएपछि काठमाडौंका विभिन्न ग्यास बिक्री केन्द्रमा उपभोक्ताको भीड बढेको छ। नयाँसडकस्थित धर्मपथ क्षेत्रमा समेत ग्यास लिन सर्वसाधारण लामो लाइनमा बस्न बाध्य भएका छन्।

कतिपय उपभोक्ता ग्यास पाइने आशामा मध्यरातदेखि नै बिक्री केन्द्रमा पुग्ने गरेका छन्। माग बढेसँगै ग्यासको मूल्यसमेत बढेको उपभोक्ताको गुनासो छ। बढी मूल्य तिर्न तयार हुँदासमेत सहज रूपमा ग्यास पाउन नसकेको उनीहरूको भनाइ छ।

काठमाडौंमा मात्र नभई देशका प्रमुख सहरमा रहेका ग्यास डिलरहरूमा समेत उपभोक्ताको लाइन घट्न सकेको छैन। काठमाडौं र आसपासका क्षेत्रमा आपूर्ति हुने ग्यासका लागि आयात गरेर रिफिलिङ गरिने बुलेटसमेत नियमित रूपमा आउन सकेका छैनन्। मुख्य राजमार्ग अवरुद्ध भएपछि ग्यास बोकेका सवारीसाधन बाटोमै रोकिँदा आपूर्ति प्रणालीमा प्रत्यक्ष असर परेको व्यवसायीहरू बताउँछन्।

पृथ्वी राजमार्ग काठमाडौं उपत्यकालाई देशका विभिन्न भागसँग जोड्ने प्रमुख सडक भएकाले यसको अवरोधले दैनिक उपभोग्य वस्तुको आपूर्तिमा समेत असर पार्न थालेको हो।

लामो समयसम्म सडक सञ्चालनमा नआए काठमाडौं उपत्यकामा ग्याससँगै पेट्रोलियम पदार्थ र अन्य अत्यावश्यक वस्तुको अभाव थप गम्भीर बन्न सक्ने जोखिम देखिएको छ। काठमाडौंमा खाना पकाउने ग्यासको अभाव र बिक्री केन्द्रमा देखिने लामो लाइनको समस्या नयाँ भने होइन। पछिल्लो दुई महिनादेखि नै विभिन्न स्थानमा ग्यास लिन उपभोक्ताको लाइन देखिँदै आएको छ।

अहिले पृथ्वी राजमार्ग अवरुद्ध भएपछि पहिल्यैदेखि रहेको समस्या थप जटिल बनेको हो। दैनिक उपभोगको अत्यावश्यक वस्तु ग्यासका लागि सर्वसाधारणले घण्टौँ लाइन बस्नुपर्ने अवस्था आए पनि सरकारले समस्या समाधानका लागि पर्याप्त पहल नगरेको उपभोक्ताको गुनासो छ।

ग्यासको मूल्य बढेको, माग बढेको र आपूर्ति सहज नभएको अवस्थामा सर्वसाधारणको दैनिक जीवन थप असहज बन्दै गएको छ। यता, सम्बन्धित निकायले पहिरो पन्छाएर पृथ्वी राजमार्ग सञ्चालनमा ल्याउने प्रयास जारी राखेका छन्। तर सडकमा भएको क्षति र पहिरोका कारण तत्कालै पूर्ण रूपमा यातायात सञ्चालनमा ल्याउन चुनौती देखिएको छ।

राजमार्ग लामो समयसम्म अवरुद्ध रहे आपूर्ति व्यवस्थामा थप दबाब पर्न सक्ने भएकाले सरकारले वैकल्पिक मार्गबाट अत्यावश्यक वस्तुको आपूर्ति, ग्यासको पर्याप्त मौज्दात र वितरण प्रणालीलाई व्यवस्थित गर्न तत्काल पहल गर्नुपर्ने देखिन्छ।

राजमार्ग खुलाउन ढिलाइ हुँदै जाँदा काठमाडौंमा ग्यासको लाइन अझै लामो हुने र सर्वसाधारणको दैनिक जनजीवन थप प्रभावित हुने जोखिम बढेको छ।