परराष्ट्रमन्त्री खनाल र जापानी विदेशमन्त्रीबीच भेटवार्ता::Nepal News Portal

परराष्ट्रमन्त्री खनाल र जापानी विदेशमन्त्रीबीच भेटवार्ता

जन आकाश
मंगलबार, असोज ६ २०८३

काठमाडौं । परराष्ट्रमन्त्री शिशिर खनाल र जापानका विदेशमन्त्री मोटेगी तोसिमित्सुबीच संयुक्त राष्ट्रसंघको ८१औँ महासभाका क्रममा न्युयोर्कमा द्विपक्षीय भेटवार्ता भएको छ।

भेटवार्तामा जापानी विदेशमन्त्री मोटेगीले नेपालमा हालै आएको विनाशकारी बाढीबाट भएको जनधनको क्षतिप्रति गहिरो दुःख व्यक्त गर्दै पीडितप्रति श्रद्धाञ्जली तथा शोकसन्तप्त परिवार र प्रभावितप्रति समवेदना व्यक्त गरे।

उनले विपद्बाट प्रभावितको उद्धार तथा राहतका लागि नेपाल सरकारले गरिरहेको निरन्तर प्रयासको प्रशंसा गर्दै जापान नेपालसँगै रहेको बताए। जापानले आपत्कालीन अवस्थादेखि मध्यम तथा दीर्घकालीन पुनर्स्थापनासम्म नेपाललाई सहयोग जारी राख्ने प्रतिबद्धता पनि व्यक्त गरे।

भेटमा परराष्ट्रमन्त्री खनालले बाढीबाट भएको क्षतिप्रति जापान सरकार र जापानी जनताले व्यक्त गरेको समवेदना तथा ऐक्यबद्धताका लागि धन्यवाद दिए। साथै, विपद्का क्रममा हराइरहेका विदेशी नागरिक, जापानी नागरिकसहितको खोज तथा उद्धारका लागि नेपाल सरकारले कुनै कसर बाँकी नराखी प्रयास गरिरहेको जानकारी गराए।

भेटवार्तामा यस वर्ष नेपाल र जापानबीच कूटनीतिक सम्बन्ध स्थापना भएको ७०औँ वार्षिकोत्सव मनाइरहेको विषयमा समेत छलफल भएको थियो।

जापानी विदेशमन्त्री मोटेगीले लोकतन्त्रको सुदृढीकरण तथा राष्ट्र निर्माणका क्रममा जापानले नेपाललाई निरन्तर सहयोग गर्दै आएको उल्लेख गर्दै आगामी नोभेम्बरमा नेपालमा आयोजना हुने ‘नेपाल–जापान फेस्टिभल’ले दुई देशबीचको मैत्रीपूर्ण सम्बन्धलाई थप गहिरो बनाउन योगदान पुर्‍याउने विश्वास व्यक्त गरे।

उनले प्रधानमन्त्री बालेन्द्र शाह नेतृत्वको सरकारसँग जापानले नेपालको विकास प्रयासमा निरन्तर सहयोग गर्ने प्रतिबद्धता जनाए।

जापानको दीर्घकालीन सहयोगप्रति धन्यवाद व्यक्त गर्दै परराष्ट्रमन्त्री खनालले कूटनीतिक सम्बन्ध स्थापनाको ७०औँ वर्षको अवसरमा नेपाल–जापान सम्बन्धलाई आगामी दिनमा थप विस्तार र सुदृढ गर्न नेपाल इच्छुक रहेको बताए।

फेसबुक प्रतिक्रिया

लिंकहरु

परराष्ट्रमन्त्री खनाल र जापानी विदेशमन्त्रीबीच भेटवार्ता

नबिन योगी दैलेखका उदाउँदो युवा नेता जनताका बिचमा लोकप्रिय आउँदो स्थानीय तहको निर्वाचनमा दुल्लु नगरको…

गोकुलगंगा–१ चुचुरेमा ट्र्याक्टर दुर्घटना, एक जनाको मृत्यु

मोडेल तथा गायिका रमिता भण्डारीको नयाँ म्युजिक भिडियो ‘तिमी निष्ठुरी भयौ’ सार्वजनिक

रामेछाप रास्वपामय बन्दैः डा. कृष्णहरि जनतासँग नेपाली काँगे्रस, एमाले, नेपाल कम्युनिष्ट पार्टी पछिपछि

च्याउ टिप्न गएका ढालबहादुर कार्की भालुको आक्रमणबाट गम्भीर घाइते

सायरी गोर्खाबाट रबि,बिक पाखा पखेरा संगको गहिरो सम्बन्ध

आचार्यकृत ‘’ऐतिहासिक नुवाकोट (भाग–१)’’सार्वजनिक

गजल समीक्षा तेज प्रकाश बानियाको कलमबाट

नम्रता गुरागाईँकृत निबन्धसङ्ग्रह ‘भूगोलका सपनाहरू’ लोकार्पण

जन आकाश मिडियाका सस्थापक आजिवन सदस्यको अध्यक्षता कार्यक्रम सप्पन्न

लिंकहरु