मंगलबार, कार्तिक १८ २०८३ | Tuesday 3rd November 2026 
जन आकाश
काठमाडौं । राति १० बजेपछि होटल तथा व्यवसाय बन्द गर्न मोरङ प्रशासनले दिएको निर्देशनप्रति कोशी प्रदेशका मुख्यमन्त्री हिक्मतकुमार कार्कीले आपत्ति जनाएका छन्।
सुरक्षा व्यवस्थापनको जिम्मेवारीबाट पन्छिएर नागरिक तथा पर्यटकको आवागमनमा समयसीमा तोक्नु उचित नहुने मुख्यमन्त्री कार्कीको भनाइ छ।
सामाजिक सञ्जालमार्फत आफ्नो धारणा सार्वजनिक गर्दै उनले राज्यको दायित्व नागरिक तथा देशमा आउने पाहुनालाई २४ सै घण्टा सुरक्षा र सेवा उपलब्ध गराउनु रहेको बताएका छन्।
अन्तर्राष्ट्रिय विमानस्थल २४ सै घण्टा सञ्चालन हुने तथा सडक र आन्तरिक हवाई यातायातमार्फत यात्रु जुनसुकै समयमा गन्तव्यमा पुग्न सक्ने अवस्थामा राति १० बजेपछि होटल बन्द गर्ने निर्देशन व्यावहारिक नहुने उनको तर्क छ।
मुख्यमन्त्री कार्कीले भारतका सीमावर्ती सहरमा रहेका अन्तर्राष्ट्रिय विमानस्थलमा साँझ ८–९ बजे अवतरण गर्ने यात्रु राति नेपाली सहरमा आइपुग्न सक्ने उदाहरण दिँदै त्यस्ता यात्रुलाई राति १० बजेपछि होटलमा बास र सेवा उपलब्ध नहुने अवस्था सिर्जना गर्न नहुने बताएका छन्।
उनले भनेका छन्, ‘राज्यले दिउँसो मात्रै सुरक्षा दिने र राति सुरक्षा उपलब्ध नगराउने भन्ने हुन सक्दैन। राति अबेर गन्तव्यमा पुग्ने नागरिक तथा पर्यटकलाई आवागमन र बासको समस्यामा पार्न हुँदैन।’
त्यस्तै, स्थानीय प्रशासन र सुरक्षा निकायले यस्ता निर्णय गर्दा स्थानीय तथा प्रदेश सरकारसँग समन्वय र परामर्श गर्नुपर्नेमा उनले जोड दिएका छन्। पर्यटन व्यवसायी, नागरिक र मुलुकको प्रतिष्ठामा पर्ने प्रभावको आकलन नगरी संवेदनशील विषयमा निर्देशन जारी गर्नु उचित नहुने उनको धारणा छ।
मुख्यमन्त्री कार्कीले सुरक्षा चुनौतीको व्यवस्थापन गर्नु राज्यको जिम्मेवारी भएको उल्लेख गर्दै नागरिकको आवागमन र व्यवसाय सञ्चालनमै रोक लगाउनेभन्दा सुरक्षा व्यवस्था प्रभावकारी बनाउनुपर्ने बताएका छन्।
सुरक्षा र पर्यटनमैत्री वातावरणबीच सन्तुलन कायम गर्दै नागरिक तथा पर्यटकलाई सहज रूपमा सेवा उपलब्ध गराउने व्यवस्था गर्नुपर्ने सन्देशसमेत उनले दिएका छन्।
© 2026 All right reserved to janaaakash.com | Site By : SobizTrend
