शनिबार, कार्तिक १५ २०८३ | Saturday 31st October 2026 
जन आकाश
चितवन— वन्यजन्तु अवलोकनका लागि देशको मुख्य गन्तव चितवन राष्ट्रिय निकुञ्जको प्रमुख नाका सौराहामा पुस १० गतेदेखि १४ गतेसम्म १७ औं चितवन हात्ती तथा पर्यटन महोत्सव हुने भएको छ । क्रिसमस तथा अंग्रेजी नयाँ वर्षको अवसर पारेर महोत्सव आयोजना हुँदै आएको क्षेत्रीय होटल संघ चितवन सौराहाका अध्यक्ष गंगा गिरीले बताए ।
क्षेत्रीय होटल संघले आयोजना गर्दै आएको महोत्सवको मुख्य सहआयोजकमा युनाइटेड हात्ती सञ्चालक सहकारी संस्था लिमिटेड र रेस्टुरेन्ट एन्ड बार एसोसियसन (रेबान) नेपाल चितवन शाखा रहेका छन् । क्षेत्रीय होटल संघले सुरूमा सौराहामा हात्ती दौडका नाममा कार्यक्रम गर्दथ्यो । हात्ती दौड हात्तीको स्वभावअनुकूलको कार्यक्रम नभएको भनेर संरक्षणकर्मीहरूले प्रतिवाद गरेपछि स्वरूप बदल्दै महोत्सवको रूप दिइएको हो ।
यस पटक महोत्सवका सबै गतिविधि हात्तीका लागि अनुकूल हुने खालका रहेको महोत्सव आयोजक समितिका संयोजक ओमप्रकाश पाण्डेले बताए । हात्ती दौड, हात्ती फुटबल र हात्ती पोलोजस्ता कार्यक्रम नहुने, हात्ती श्रृङ्गार, हात्ती वनभोज गर्ने र आपसमा मिल्ने हात्तीहरूको लहर प्रदर्शन गर्ने पाण्डेले जानकारी दिए ।
सौराहाको पर्यटनको आधार नै हात्ती हो । निकुञ्ज घुम्न आउने लाखौँ पर्यटकमध्ये अधिकांस हात्ती सफारी गरेर जंगल डुल्छन् । त्यसैगरी निकुञ्जमा जंगली हात्ती पनि ओहोरदोहोर गर्छन् । हात्तीको महत्व र स्वभाव बुझाउन महोत्सव अवधिभर विभिन्न कार्यक्रमहरू गर्ने क्षेत्रीय होटल संघका पूर्वअध्यक्ष दीपक भट्टराईले बताए । महोत्सव अवधिमा चितवनका अन्य पर्यटकीयस्थलको पनि प्रचार प्रसार र प्रवर्द्धन गर्ने उनले बताए ।
सधैं बाघमारा वनको चौरमा हुँदै आएको महोत्सव यस पटक रत्ननगरपालिका–७ चित्रसारीनजिक मौनाहाचौरमा हुने भएको छ । कोरोनाका कारण बीचका तीन वर्ष हुन नसकेको हात्ती महोत्सव कोरोनापछि पहिलो पटक हुन लागेको हो ।
© 2026 All right reserved to janaaakash.com | Site By : SobizTrend
