शनिबार, कार्तिक १५ २०८३ | Saturday 31st October 2026 
जन आकाश
काठमाडौं– रामेछापको फर्पुमा पहिरोले घरसहित बगाउँदा तीन जना किशोरीको ज्यान गएको छ । उनीहरूलाई घरमाथिबाट आएको पहिरोले घरसहित बगाएको हो ।
गए राति ८ः४० बजेको समयमा रामेछाप जिल्लाको गोकुलगंगा गाउँपालिका वडा नं ६ फर्पु बस्ने विमान तामाङको घरमाथि देखि झरेको पहिरोले उनकी छोरीसहित दुई छिमेकीका छोरीहरू समेत बगाएर बेपत्ता बनाएको जिल्ला प्रहरी कार्यालय रामेछापले जनाएको हो ।
साँझको समयमा घर भित्र रहेकी विमान तामाङकी छोरी १८ वर्षीय सिता तामाङ, छिमेकीकी १५ वर्षीय आशिका दोङ र पदम १३ वर्षीय लक्ष्मी तामाङलाई माथिबाट आएको पहिरोले बगाएको हो ।
पहिरोले बेपत्ता बनाएको खबर प्राप्त हुने बित्तिक खटिएको प्रहरी टोलीले खोजतलास गर्ने क्रममा तीनै जना किशोरीलाई मृत फेला पारेको जिल्ला प्रहरी कार्यालय रामेछापले जनाकारी गराएको हो ।
बर्खा लागेसँगै साना तिना पहिरो बाहेक ठुलो घटना नभएको रामेछापमा एक्काशी पहिरो जाँदा फर्पुमा विमान तामाङसँगै छिमेकी पेमा तामाङ र पदम तामाङका छोरीहरू पहिरोमा परेका हुन् ।
घरसंगै बगेका तीनै जना किशोरीहरूलाई स्थानीय र प्रहरीसहित टोलीले खोजी गर्ने क्रममा राति आधा घण्टा पछि मृत फेला पारेको हो । मृतक तीनै जना किशोरीहरुको शव आज पोष्ट मार्टम गरेर परिवारको जिम्मा लगाउने तयारी भइरहेको जिल्ला प्रहरी कार्यालय रामेछापका प्रवक्ता कौशल न्यौपानेले बताएका हुन् ।
© 2026 All right reserved to janaaakash.com | Site By : SobizTrend
