बिहिबार, भाद्र २५ २०८३ | Thursday 10th September 2026 
जन आकाश
बिनोद नेपाली ।
काठमाडौं । बर्दगोरिया गाउँपालिकामा मृत्युवरण गरेका व्यक्तिको पार्थिव शरीरलाई सम्मानसहित दाहसंस्कारका लागि घाटसम्म लैजानको लागि बर्दगोरिया गाउँपालिका अध्यक्ष कर्ण बहादुर कुँवरको सक्रिय पहलमा एक ऐतिहासिक कदम चालिएको छ ।
गाउँपालिका अध्यक्ष कुँवरको नेतृत्वमा, अब बर्दगोरिया गाउँपालिकाका नागरिकलाई निशुल्क महाप्रस्थान यान (अन्त्येष्टि वाहन) सेवा उपलब्ध गराइने भएको छ। यस सेवाले मृतकका परिवारलाई कठिन समयमा सुविधा र सहयोग प्रदान गर्ने छ, जसले गर्दा पार्थिव शरीरलाई सम्मानका साथ दाहसंस्कार स्थलसम्म सहज रूपमा पुर्याउन सकिन्छ।
यस सेवा अन्तर्गत, बर्दगोरिया गाउँपालिकाले मृतकका परिवारलाई रु १०,००० सम्मको क्रिया खर्च उपलब्ध गराउने पनि घोषणा गरेको छ, जसले गर्दा मृतकको परिवारलाई आर्थिक रूपमा थोरै राहत पुग्नेछ। यस पहलले बर्दगोरिया गाउँपालिका क्षेत्रमा सामाजिक एकता र सहयोगको भावना बलियो बनाउनेछ।
अध्यक्ष कर्ण बहादुर कुँवरले यस सेवा संचालनमा ल्याएर, स्थानिय जनतामा समर्पण र सहयोगको भावना प्रकट गरेका छन्, र मृतकका परिवारलाई सम्मानजनक र सस्तो माध्यममा अन्तिम संस्कारको प्रक्रिया पुरा गर्नका लागि उत्तम वातावरण सृजना गर्न सफल भएका छन्।
© 2026 All right reserved to janaaakash.com | Site By : SobizTrend
