शुक्रबार, कार्तिक १४ २०८३ | Friday 30th October 2026 
जन आकाश
फाइल तस्बिर
काठमाडौं । नेकपा (एमाले)का सचिव तथा पूर्वमन्त्री महेश बस्नेतले आफूलाई पक्राउ गरेर पार्टी अध्यक्ष केपी शर्मा ओलीविरुद्ध भइरहेको प्रतिशोधात्मक कारबाहीको विरोधमा उठेको आन्दोलनलाई कमजोर पार्ने षड्यन्त्र भइरहेको आरोप लगाएका छन् ।
आइतबार सामाजिक सञ्जाल फेसबुकमा एक स्ट्याटस लेख्दै उनले आफू विरुद्ध पुरानै मुद्दालाई पुनः ब्युँताएर पक्राउ गर्ने र मिडिया ट्रायल गर्ने योजना बनाइएको दाबी गरेका हुन् ।
बस्नेतले आफ्नो फेसबुक स्ट्याटसमा तीन वर्षअघि एक फेक व्यक्ति लाई अगाडि सारेर आफू विरुद्ध झुट्टा जाहेरी दर्ता गराइएको र उक्त जाहेरी प्रहरी अनुसन्धानबाटै फर्जी प्रमाणित भइसकेको दाबी गरेका छन् । सोही विषयमा उच्च अदालत पाटनमा परेको रिट खारेज भइसकेको र मुद्दा अदालतमा विचाराधीन रहेको अवस्थामा फेरि उही व्यक्तिलाई प्रयोग गरेर तेस्रो पटक जाहेरी दिन लगाइएको उनको आरोप छ ।
आफू फरार रहेको र फोन अफ गरेको भन्ने प्रचारलाई उनले पूर्णतः भ्रामक र गलत भएको बताएका छन् । ‘मेरो फोन अफ रहेको र म फरार भएको भन्ने प्रचार पूर्णतः भ्रामक र गलत हो। यस्ता हल्ला फैलाएर जनमत भ्रमित गर्ने प्रयास भइरहेको छ। यस्ता कुकर्महरूको परिणाम अन्ततः सम्बन्धित पक्षका लागि नै कठिन साबित हुनेछ ।’, उनले लेखेका छन् ।
उनकै कारण आफू पीडित भएको भन्दै शोभा पाठकले आइतबार जिल्ला सरकारी वकिलको कार्यालय, काठमाडौँमा पक्राउ गरी कारबाही गर्न मागसहित पूरक जाहेरी दर्ता गराएकी छन् ।
© 2026 All right reserved to janaaakash.com | Site By : SobizTrend
